ဘုရင်မကြီးရှင်စောပု
==============
ဧကရာဇ်မင်းတို့၏ ရတနာတစ်ပါးမှ ဧကရီဘုရင်မကြီးဘဝသို့
==========================================
.
သမိုင်းကြောင်းတစ်လျောက် ပြန်ကြည့်မယ်ဆုိုရင် မြန်မာနိုင်ငံမှာသာမက အရှေ့တောင်အာရှနိုင်ငံတွေမှာ ဘုရင်မ ဆိုတာ ရှားရှားပါးပါး။ အဲဒီ ရှားပါးလှတဲ့ သမိုင်းဖြစ်ရပ်တွေထဲက ဘုရင်မကြီးရှင်စောပုဆိုတာ မြန်မာရာဇဝင်မှာ ပေါ်ထွန်းခဲ့ဘူးတယ်။ အာဏာရဖို့ အနိုင်ယူလူသတ်ရင်း ဘုရင်ဖြစ်ခဲ့တာမျိုး မဟုတ်ဘဲ မူးမတ် ပြည်သူ အားလုံးက ချစ်လို့ ယုံကြည်လို့ တင်မြောက်ခဲ့တဲ့ ဘုရင်မကြီးလည်းဖြစ်တယ်။ အဲဒီအချက်နဲ့တင် မြန်မာတို့ရဲ့ ရာဇဝင်ဟာ ဂုဏ်ယူစရာ ဖြစ်ခဲ့တယ်။
.
ဘုရင်မကြီးရှင်စောပုရဲ့ ဘဝဟာ ဟံသာဝတီနေပြည်တော် ရွှေနန်းရှင်ဧကရာဇ်ဘုရင်တစ်ပါးရဲ့ သမီးတော်ဘဝ ကနေ မင်းမိဖုရားဘဝ၊ စစ်ရဲ့ငြိမ်းချမ်းရေးပြယုဂ် လက်ဆောင်ရတနာတစ်ပါး အနေနဲ့ အင်းဝနေပြည်တော်ကို ဆက်သခံခဲ့ရတယ်။ ကိုယ်ချစ်တဲ့ ဟံသာဝတီနေပြည်တော် ပြန်ရောက်ပြန်တော့ အာဏာလုပွဲတွေကြားမှာ အကိုတော်၊ မောင်တော်၊ သားတော်၊ တူတော်တွေ ဆုံးပါးမှုတွေနဲ့ကြုံခဲ့ရတယ်။ နောက်ဆုံးမှာ အာဏာလုပွဲတွေ ဧကရာဇ်မင်းတွေရဲ့ ဒဏ်ကို မခံနိုင်တော့တဲ့ အဆုံး မူးမတ်တွေက ဘုရင်ကို လုပ်ကြံပြီး ပြည်သူပြည်သား တွေရဲ့ ချစ်ခြင်းမေတ္တာနဲ့ တင်မြောက်ခဲ့တဲ့ ဘုရင်မကြီးဘဝ ကို ရောက်ခဲ့တယ်။ ဘဝရဲ့ နေဝင်ချိန် ရောက်ပြန်တော့ အာဏာကို မက်မောဆုပ်ကိုင်မထားဘဲ သင့်တော်တဲ့ ပညာရှိတစ်ယောက်ရဲ့ လက်ထဲကို တိုင်းပြည်ကိုအပ်၊ ဘာသာရေးကို ဇောက်ချလုပ်ရင်း ဘဝကို ငြိမ်းငြိမ်းချမ်းချမ်း အဆုံးသတ်ခဲ့တယ်။
.
ရာဇဝင်ကို နဲနဲပြန်ကောက်ရရင် ဘုရင်မကြီးရှင်စောပု ရဲ့ ငယ်နာမည်ဟာ ဝိဟာရဒေဝီ လို့အမည်ရပြီး ပဲခူးဟံသာဝတီနေပြည်တော်က မွန်တို့ရဲ့ စစ်ဘုရင် ဧကရာဇ်ကြီး ရာဇာဓိရာဇ် နဲ့ မယ်တော် သုဒ္ဓမာယာ တို့က ခရစ်သက္ကရာဇ် ၁၃၉၃ မှာ မွေးဖွားခဲ့တယ်။ အဲဒီအချိန်ဟာ မြန်မာရာဇဝင်မှာ လူသိများတဲ့ အနှစ် ၄၀ ကြာ ပဲခူး-အင်းဝ စစ်ပွဲကြီး (၁၃၈၅ - ၁၄၂၄) ဖြစ်နေချိန်ပေါ့။
.
ဝိဟာရဒေဝီမင်းသမီး မမွေးဖွားခင် သူ့ရဲ့မယ်တော် ဖြစ်လာမယ့် မိဖုရား သုဒ္ဓမာယာ ဟာ ပဒေသရာဇ်စနစ်ရဲ့ သားကောင်ဖြစ်ခဲ့ဘူးတယ် ဆိုတာ တချို့တွေ သတိထားမိမယ် မထင်ဘူး။ ခရစ်သက္ကရာဇ် ၁၃၈၈ ဝန်းကျင်မှာ ခမည်းတော် ရာဇာဓိရာဇ်မင်းကြီးဟာ အောက်ပြည်အောက်ရွာကို သိမ်းသွင်းနေချိန်မှာ ပုသိမ် - မြောင်းမြ ကို သိမ်းယူဖို့ဖြစ်လာတယ်။ အဲဒီ ပုသိမ်စစ်မှာ သူ့ရဲ့စစ်သူကြီး လဂွန်းအိန်ကို ခေါင်းဆောင်ခန့်လို့ တိုက်စေတယ်။ ပုသိမ်စစ်ဟာ အန္တရယ်ကြီးလှတဲ့ စစ်ပွဲ၊ အသက်နဲ့လဲရနိုင်တယ်လို့ တွက်မိတဲ့ လဂွန်းအိန်က စစ်ထွက်ခါနီး မနက်ကျမှ ရာဇာဓိရာဇ်မင်းကြီးရဲ့ မိဖုရားသုဒ္ဓမာယာ ကို လိုချင်ပါတယ်လို့တောင်းဆိုတော့တာဘဲ။ အမှန်ကတော့ လဂွန်းအိန် က သူ့အရှင်သခင်ရဲ့ သူ့အပေါ်ချစ် မချစ် စိတ်စမ်းလိုက်တာပါဘဲ။ အဲဒီအခါ ရာဇာဓိရာဇ်မင်းကြီးက ပြန်ပြောတယ်။ သူရဲကောင်းလည်း ချစ်တယ်၊ မိဖုရားလည်းချစ်တယ်။ ဒါပေမဲ့ မိဖုရားဆိုတာ အာရုံဖြည့်ဖို့ဖြစ်တယ်၊ သူရဲကောင်းဆိုတာကတော့ ရန်သူတွေကို တွန်းလှန်ဖို့ အဖေါ်၊ ထီးဖြူကို စောင့်တဲ့အဖေါ်၊ နတ်ပြည်နိဗ္ဗာန် ချမ်းသာသုခအတွက် သာသနာတော်ကို စောင်မဲ့ အဖေါ်၊ ဒါကြောင့် သူရဲကောင်းကို ပိုချစ်တယ်လို့ ပြောပြီး မိဖုရားသုဒ္ဓမာယာကို လဂွန်းအိန် ထံပို့လိုက်တာပါဘဲ။ ရာဇာဓိရာဇ်မင်းကြီးကို ခြေသလုံးဖက် ငိုကြွေးတောင်းပန်နေတဲ့ မိဖုရားသုဒ္ဓမာယာ စကားတွေ၊ မျက်ရည်တွေဟာ စစ်ဘုရင်တစ်ပါး အတွက်တော့ အရေးမပါခဲ့ဘူးပေါ့။ လဂွန်းအိန်က သူ့အရှင်သခင်ရဲ့ ချစ်ခြင်းကို စမ်းသပ်ခဲ့တာ၊ မိဖုရားသုဒ္ဓမာယာကို လက်မခံခဲ့ပါဘူး။ ကန်တော့ပွဲနဲ့ တောင်းပန်ခဲ့ပြီး သူ့အရှင်သခင်ထံ ပြန်လွတ်ခဲ့တယ်။ ပြီးတော့ စစ်ထွက်သွားခဲ့တယ်။
.
ပဒေသရာဇ်စနစ်အောက်မှာ ရှိခဲ့တဲ့ မိန်းမသားတစ်ယောက်ရဲ့ ဘဝဟာ ဒါပါဘဲ။ ဒီအဖြစ်အပျက်တွေကို ဝိဟာရဒေဝီမင်းသမီးလေး ကြီးပြင်းလာတဲ့အခါ သိကောင်းသိခဲ့ပါလိမ့်မယ်။ မိန်းမသားတစ်ယောက်ရဲ့ဘဝဟာ ဧကရာဇ်ဘုရင်တစ်ပါးရဲ့ လက်ထဲမှာ ရတနာတစ်ပါးသာဖြစ်တယ်ဆိုတာ သဘောပေါက်ခဲ့ပါလိမ့်မယ်။ ဒါကြောင့်လည်း သူကြီးပြင်းလာတဲ့ အခါ တွေ့ကြုံသမျှကို ရဲရဲဝံ့ဝံ့ ရင်ဆိုင်ခဲ့တာပါဘဲ။
.
ဇတ်လမ်းဆက်ရရင် ဝိဟာရဒေဝီမင်းသမီး အသက် ၂၀ ပြည့်တဲ့အခါ ရာဇာဓိရာဇ်မင်းကြီးရဲ့ တူတော်လည်းဖြစ် ၊ သူ့ချစ်သူလည်းဖြစ်တဲ့ သမိန်စည်သူနဲ့ စုံဖက်စေခဲ့တယ်။ သမီးနှစ်ယောက် သားတစ်ယောက် ထွန်းကားခဲ့တယ်။ ခရစ်သက္ကရာဇ် ၁၄၁၈ အသက် ၂၅ နှစ်မှာ သားဖြစ်သူ ဗညားဗရူးကို မွေးဖွားခဲ့တယ်။ အဲဒီ အသက် ၂၅ နှစ် က စလို့ ဝိဟာရဒေဝီမင်းသမီးလေးဟာ လောကဓံတရားရဲ့စတင် ရိုက်ခတ်မှုကို ခံခဲ့ရတယ်။ ခင်ပွန်းဖြစ်သူ သမိန်စည်သူ ကွယ်လွန်ခဲ့တယ်။ နောက် ၃ နှစ်အကြာ ခရစ်သက္ကရာဇ် ၁၄၂၁ မှာ ခမည်းတော် ရာဇာဓိရာဇ်မင်းကြီး ဆင်လိုက်ရင်းနဲ့ ဒဏ်ရာရပြီး ကွယ်လွန်ခဲ့တယ်။ ရာဇာဓိရာဇ်မင်းကြီးရဲ့ သားတော်အကြီး ဗညားဓမ္မရာဇာ နန်းတက်ခဲ့တယ်။
.
အင်းဝနေပြည်တော်မှာလည်း မင်းပြောင်းမင်းလွဲတွေ ဖြစ်နေခဲ့တယ်။ အနှစ် ၄၀ စစ်ပွဲကို စတင်ခဲ့တဲ့ မင်းကြီးစွာ ကွယ်လွန်ပြီးတဲ့နောက် မင်းအဆက်ဆက် နန်းတက်ခဲ့ကြတယ်။ သားတော် ဆင်ဖြူရှင်၊ ငနောက်ဆံ၊ နောက် ဆင်ဖြူရှင်ရဲ့ ညီတော် ပြင်စည်စား မင်းဆွေက မင်းခေါင် နာမည်နဲ့ ခရစ်သက္ကရာဇ် ၁၄၀၁ မှာ နန်းတက်တယ်။ မင်းကြီးစွာနဲ့ ရာဇာဓိရာဇ်တို့ စခဲ့တဲ့ အနှစ် ၄၀ စစ်ပွဲကြီးကို ဘုရင်မင်းခေါင် လက်ထက်မှာလဲ ဆက်ခဲ့တယ်။ ခရစ်သက္ကရာဇ် ၁၄၂၁ မှာ ဘုရင်မင်းခေါင်ရော ရာဇာဓိရာဇ်တို့ ရှေ့ဆင့်နောက်ဆင့် ကွယ်လွန်ခဲ့ကြတယ်။
.
ဒါပေမဲ့ ပွဲက မပြီးသေးဘူး။ အင်းဝမှာ နန်းတက်လာတဲ့ ဘုရင်မင်းခေါင်ရဲ့သား ဆင်ဖြူရှင်သီဟသူ နဲ့ ပဲခူးမှာနန်းတက်လာတဲ့ ရာဇာဓိရာဇ်ရဲ့သား ဗညားဓမ္မရာဇာ တို့ စစ်မွေကို ဆက်ခံရင်း ဆက်တိုက်ခဲ့ကြတယ်။ ခရစ်သက္ကရာဇ် ၁၄၂၂ ဆင်ဖြူရှင်သီဟသူရဲ့ တပ်တွေ ပဲခူးကိုချီတက်ခဲ့ကြတယ်။ ခဲပေါင် နဲ့ ပုသိမ်ကို သိမ်းပြီး ဒလ ကို တစ်လကြာဝန်းရံထားတဲ့အခါ ဒဂုံမင်း ဗညားရံ က နှစ်မတော် ဝိဟာရဒေဝီမင်းသမီးကို ဆင်ဖြူရှင်သီဟသူ ကို ဆက်သပြီး ငြိမ်းချမ်းရေးလုပ်တယ်။ အဲဒါ အနှစ် ၄၀ စစ်ပွဲရဲ့ အဆုံးသတ်ပါဘဲတဲ့။ ဝိဟာရဒေဝီမင်းသမီးဟာ ငြိမ်းချမ်းရေးရဲ့ ပြယုဂ်ပေါ့။ တစ်ခြားအကြောင်းတွေလည်း အင်းဝနေပြည်တော်မှာ ရှိခဲ့တာပေါ့။ ဒါပေမဲ့ ဝိဟာရဒေဝီမင်းသမီး ကို ဆင်ဖြူရှင်သီဟသူ အလွန်မြတ်နိုးတာဟာ စစ်ပွဲတွေ ချုပ်ငြိမ်းသွားစေခဲ့တယ် ဆိုတာတော့ ထင်ရှားလှပါတယ်။
.
အနှစ် ၄၀ စစ်ပွဲပြီးသွားလို့ နှစ်ဖက်ပြည်သူတွေ အေးချမ်းခဲ့ကြပေမဲ့ ဝိဟာရဒေဝီမင်းသမီးရဲ့ လောကဓံကတော့ သိပ်မအေးချမ်းခဲ့ဘူး။ ဝိဟာရဒေဝီမင်းသမီးကို သိရိတြိဘဝနာဒိတျာပဝရ အတုလ အဂ္ဂမဟာဓမ္မ ရာဇာဓိရာဇ မဟာဒေဝီ ဆိုတဲ့ဘွဲ့ကြီးနဲ့ ဆင်ဖြူရှင်သီဟသူ လက်ထဲကိုထဲ့လိုက်ပြီးတဲ့နောက် မိဖုရားကြီးရှင်စောပုဆိုပြီး အင်းဝကို လိုက်သွားရတာပေါ့။ အဲဒီအချိန်မှာ မိဖုရားကြီးရှင်စောပုရဲ့ အသက်က ၂၉ နှစ်။ အပြင်အဆင် အရောင်အဆင်း ကောင်းလွန်းလို့ ဆင်ဖြူရှင်သီဟသူက သူ့ဖေါင်ထက်ကနေ လက်လှမ်းဆီးကြိုခဲ့တယ်လို့ ဆိုတယ်။ ဒါပေမဲ့ သမီးနှစ်ယောက်နဲ့ ၄ နှစ်သား သားငယ်ကိုထားပြီး တပြည်တရွာလိုက်သွားရတဲ့ မိဖုရားကြီးရှင်စောပုရဲ့ ခံစားချက်ကို မှန်းဆလို့ရနိုင်ပါတယ်။ သီဟသူ ကလည်း အဲဒီအချိန်မှာ အသက် ၂၈ -၂၉၊ မိဖုရားကြီးရှင်စောပု ကို ဂရုစိုက်လွန်းလို့ အင်းဝမှာရှိတဲ့ မိဖုရားရှင်ဘို့မယ် က စိတ်နာပြီး အုန်းပေါင်လယ် သံဘွား ကို လုပ်ကြံခိုင်းခဲ့တယ်။ မိဖုရားကြီးရှင်စောပုနဲ့ ၃ နှစ်လောက် ပေါင်းသင်းပြီး ဆင်ဖြူရှင်သီဟသူ ကွယ်လွန်ခဲ့တယ်။ အဲဒီနောက် ၉ နှစ်သားဘဲ ရှိသေးတဲ့ မင်းလှငယ် လို့ မင်းသားလေး နန်းတက်လာပြန်တယ်။ မိဖုရားကြီးရှင်စောပုလည်း မင်းလှငယ်မင်းရဲ့ မိဖုရားဖြစ်ရပြန်တယ်။ မင်းလှငယ်မင်း နန်းတက်လို့ ၃ လ အကြာမှာ အဆိပ်ခပ်လုပ်ကြံခံရပြီး ကွယ်လွန်တယ်။ အဲဒီနောက် ကလေးကျေးတောင်ညိုမင်း နန်းတက်ခဲ့တယ်။ မိဖုရားကြီးရှင်စောပုလည်း ကလေးကျေးတောင်ညိုမင်းရဲ့ မိဖုရားကြီးဖြစ်ရပြန်တယ်။ ကလေးကျေးတောင်ညိုမင်း နန်းတက်လို့ လပိုင်းအကြာမှာ မိုးညှင်းမင်းတရားကြီး မိုးညှင်း ကနေ အင်းဝ ကို ချီတက်လာတယ်။ ကလေးကျေးတောင်ညိုမင်း က မိဖုရားကြီးရှင်စောပုကို လက်ဆောင်ပဏ္ဏာအနေနဲ့ ပုခန်းစား တရဖျားကို ပေးအပ်ပြီး မိုးညှင်းမင်းတရားကြီးရဲ့ တပ်တွေကို ရင်ဆိုင်စေတယ်။ မိုးညှင်းမင်းတရားကြီးက ကလေးကျေးတောင်ညိုမင်းကို အောင်နိုင်ပြီးတော့ အင်းဝထီးနန်းကို ခရစ်သက္ကရာဇ် ၁၄၂၆ မှာ အုပ်စိုးတယ်။ မကြာခင်ဘဲ ပုခန်းမြို့ကို ဝင်တိုက်ပြီး သိမ်းယူတယ်။ မိဖုရားကြီးရှင်စောပုကိုတော့ ပြန်လည်သိမ်းယူပြီးတော့ နန်းတွင်းမှာ အိမ်ဆောက်ပြီး သာယာစွာနေစေတယ်လို့ ဆိုတယ်။
.
အင်းဝနေပြည်တော်မှာ ပျော်ရွှင်ခြင်းမရှိ၊ ဟံသာဝတီနေပြည်တော်က သားသမီးတွေနဲ့ ဆွေမျိုးသားချင်းများကို လွမ်းဆွတ်လှတာကြောင့် ခရစ်သက္ကရာဇ် ၁၄၂၉ မှာ မိဖုရားကြီးရှင်စောပုဟာ မွန်ရဟန်း ၂ ပါး၊ ရှင်ပိဋကဓရ နဲ့ ရှင်ဓမ္မဉာဏ တို့ရဲ့ အကူအညီနဲ့ အင်းဝကနေ ပဲခူးကို ရေကြောင်းခရီးနဲ့ စွန့်စွန့်စားစား ထွက်ပြေးခဲ့တယ်။ အဲဒီအချိန်မှာ မိဖုရားကြီးရှင်စောပု အသက် ၃၆ နှစ် ရှိခဲ့ပြီ။ မိုးညှင်းမင်းတရားရဲ့ တပ်တွေနောက်က လိုက်ခဲ့ပေမဲ့ မပျော်ပိုက်လို့ပြေးတာ ရှိစေတော့လို့ သဘောထားပြီးလွတ်ပေးလိုက်တယ် ထင်ပါတယ်။ ဟံသာဝတီထိ မလိုက်တော့ဘဲ ပြန်သွားခဲ့တယ်။ ဟံသာဝတီထီးနန်းမှာ စိုးစံနေတဲ့ အကိုတော် ဗညားရံကလည်း နှမတော်ကို ဝမ်းသာအားရ ကြိုခဲ့ပါတယ်။ ပြန်ရောက်ပြီးတဲ့နောက်မှာ မိဖုရားကြီးရှင်စောပုဟာ ဘာသာရေးကို ပိုပြီးအာရုံစိုက်လာခဲ့တယ်။ ကယ်တင်ခဲ့တဲ့ ရဟန်းနှစ်ပါးကို သိက္ခာပြန်တင်ပေးတယ်၊ သံဃာတော်တွေကို ကျောင်းဆောက်၊ ဆွမ်းနဲ့ လှူဘွယ်ဝထ္ထုတွေ ဆက်ကပ်လှူဒါန်းခြင်းတို့ကို လုပ်ခဲ့တယ်။ အသက် ၂၅ နှစ်လောက်က စပြီးကြုံလိုက်ရတဲ့ လောကဓံ၊ ၃၆ နှစ်ကျမှ ဘဝဟာ အေးချမ်းသလိုဖြစ်ခဲ့တယ်။
.
ခရစ်သက္ကရာဇ် ၁၄၄၆ မိဖုရားကြီးရှင်စောပု အသက် ၅၃ နှစ်လောက်မှာ အကိုတော် ဗညားရံ ကွယ်လွန်ပြီးတဲ့နောက် လောကဓံတရား က ပြန်လှည့်လာပြန်တယ်။ ဗညားရံမင်း ကွယ်လွန်ပြီးနောက် မိဖုရားကြီးရှင်စောပုရဲ့ သားတော် ဗညားဗရူးနန်းတက်ခဲ့တယ်။ နန်းတက်ပြီး မကြာခင် ဗညားဗရူးလုပ်ကြံခံရပြီး မိဖုရားကြီးရှင်စောပုရဲ့မောင်တော် ဗညားကျန်း နန်းတက်ခဲ့ပြန်တယ်။ ဗညားကျန်းလည်း နန်းသက်မကြာခဲ့။ နန်းဆံသက် ၃ နှစ်မှာ ဗညားကျန်း ကွယ်လွန်တယ်။ အဲဒီနောက် ဗညားရံရဲ့သားတော် မိဖုရားကြီးရှင်စောပုရဲ့ တူတော် လိတ်မွတ်ထော် နန်းတက်လာတယ်။ လိတ်မွတ်ထော်က မင်းကျင့်တရားနဲ့ မညီလို့ ပြည်သူတွေကိုနှိပ်စက်လို့ နန်းတက်ပြီး ၇ လ အကြာမှာ မူးမတ်တွေက လုပ်ကြံခဲ့တယ်။ နောက်ဆုံး ခရစ်သက္ကရာဇ် ၁၄၅၂ မှာ ပြည်သူတွေရဲ့သဘောထားနဲ့ မူးမတ်သေနာပတိများက တိုင်ပင်ပြီး ရာဇာဓိရာဇ်မင်းကြီးရဲ့သမီးတော် ရှင်စောပုကို ဟံသာဝတီထီနန်းရဲ့ ဘုရင်မကြီးအဖြစ် တညီတညွတ်ထဲ တင်မြောက်ခဲ့ကြတယ်။ ဘုရင်မကြီးရှင်စောပု နန်းတက်တဲ့ အချိန်ကစပြီး ဟံသာဝတီနေပြည်တော်ဟာ စစ်မက်မရှိ အေးချမ်းသာယာနေခဲ့တယ်လို့ ဆိုတယ်။ 
.
ဘုရင်မကြီးရှင်စောပုဟာ သက်တော် ၅၉ မှာ နန်းတက်ခဲ့ပြီး ၇ နှစ်ကြာ ဟံသာဝတီပြည်ကြီး အုပ်စိုးရင်း ငြိမ်းချမ်းသာယာရေး တိုးတက်ရေးတွေလုပ်ခဲ့တယ်။ ခရစ်သက္ကရာဇ် ၁၄၅၉ ဘုရင်မကြီးရှင်စောပု သက်တော် ၆၆ နှစ်မှာ ဟံသာဝတီထီးနန်းကို အာဏာလွှဲဖို့ပြင်တယ်။ ဘုရင်မကြီးရှင်စောပုရဲ့ ရာဇဝင်မှာ ဒီအခန်းလေးကဖြင့် အလှဆုံးပါဘဲ။ ဘုရင်မကြီးရှင်စောပုက သူ့ကို အင်းဝက ကယ်ဆယ်ခဲ့တဲ့ ရဟန်း ဘုန်းပညာ လက္ခဏာနဲ့ ပြည့်စုံတဲ့ ရှင်ပိဋကဓရ ကို လူဝတ်လဲပြီး နန်းတင်ချင်တယ်။ မူးမတ်တွေက ကန့်ကွက်တယ်။ အဲဒီအခါ မူးမတ်ပညာရှိတွေ သေနာပတိစစ်သူကြီးတွေကို စုဝေးစေပြီး ကြည်ငြိုဖွယ်ရာ ထုထားတဲ့ ဗုဒ္ဓရုပ်ပွားတော် ကို ကြည်ငြိုစေတယ်။ အားလုံး ကြည်ငြိုကြပြီးမှ လူအများဖြတ်သွားတဲ့ တံတားတစ်ခုက သစ်သားတိုင်ကိုပြတယ်။ ဒီ ဗုဒ္ဓရုပ်ပွားတော်ဟာ ဒီသစ်သားတိုင်က ထုလုပ်ထားတာလို့ ရှင်းပြတဲ့အခါ မူးမတ်ပညာရှိကြီးတွေက ဘုရင်မကြီးပြောချင်တာကို သဘောပေါက်သွားကြတယ်။ ယုတ်ညံ့ခြင်း မြင့်မြတ်ခြင်း ဆိုတာတွေဟာ လူတွေရဲ့ အပေါ်ယံသဘောထားတွေပါဆိုတာကို သိသွားကြတယ်။ နောက်ဆုံး အားလုံးသဘောတူညီစွာနဲ့ ရှင်ပိဋကဓရ ဘိက္ခုကို လူထွက်စေပြီး ဓမ္မစေတီမင်း ဆိုပြီး နန်းတက်စေကာ ဘုရင်မကြီးရဲ့ သမီးတော် မိပကာထော်နဲ့ စုံဖက်စေတယ်။
.
အာဏာလွဲပေးခဲ့တဲ့နောက်မှာ ဘုရင်မကြီးရှင်စောပုဟာ ဘာသာရေးကို ဇောက်ချပြီးလုပ်ခဲ့တယ်။ ကျိုက်မရော ဆုတောင်းပြည့်ဘုရား၊ ကော့ဘိန်း ကျောင်တောင်ဂူ၊ ဓမ္မသတ်ဂူ၊ ခရုံဂူ၊ ကော့ကွန်းဂူ၊ ဖားကပ်ဂူ စတဲ့ ဂူဘုရားတွေ ကို ပြန်လည် မွမ်းမံခဲ့တယ်။ ပဲခူးခရိုင် ဘုရားကြီးရွာမှာရှိတဲ့ ဘုရားကြီးကို မွမ်းမံပြီး ကျောက်စာရေးထိုးခဲ့တယ်။ သထုံခရိုင် ကေလာသတောင်ပေါ်မှာရှိတဲ့ ကေလာသစေတီတော်ကို မွမ်းမံခဲ့တယ်။ ဒဂုန်ဆံတော်ရှင် ရွှေတိဂုံ စေတီတော် မှာတော့ မိမိရဲ့ ကိုယ်အလေးချိန်နဲ့ထပ်တူ ရွှေ ၂၅ ပိသာ ကို ရွှေသင်္ကန်းကပ်ခဲ့တယ်။ အခြားသော လှူဒါန်းမှု အမျိုးမျိုးကိုလည်းပြုခဲ့တယ်။ ဘုရင်မကြီးရဲ့ ဘဝ တစ်လျောက်လုံးမှာ ချစ်သောသူတို့နဲ့ ရှင်ကွဲ ကွဲရခြင်း သေကွဲ ကွဲရခြင်းတွေ၊ မချစ်မနှစ်သက်သော သူတို့နဲ့ ပေါင်းဖေါ်နေထိုင်ရခြင်း ဆိုတာတွေ အပြည့်ပေါ့။ အဲဒါတွေဟာ ဘုရင်မကြီးရဲ့ ဘဝနေဝင်ချိန်မှာ ဘာသာရေးကို ပိုပြီးအာရုံစိုက်မိစေတယ် ထင်ပါတယ်။
.
ခရစ်သက္ကရာဇ် ၁၄၇၁ ဘုရင်မကြီးရှင်စောပု သက်တော် ၇၉ နှစ် ရောက်လို့ ဇရာရောဂါ ဖိစီးလာတဲ့အခါ ရွှေတိဂုံ စေတီတော်ရဲ့ အနောက်တောင်အရပ် ဆောက်လုပ်ထားတဲ့ စံတော်အိမ်မှာ ရွှေတိဂုံ စေတီတော်ကြီးကို အာရုံပြုရင်း သမာဓိတည်ကြည်စွာနဲ့ ရှိခိုးကန်တော့ရင်း ကွယ်လွန်ခဲ့တယ်။
.
ဘုရင်မကြီးရှင်စောပု ဘဝကို ကြည့်ရင် မင်းသမီး သို့မဟုတ် ဘုရင်မတစ်ပါးရဲ့ အလှတရားထက် လောကဓံကို ခံနိုင်ရည်ရှိတဲ့သူ၊ ကိုယ့်ပြည်သူမွန်လူမျိုးတို့ကို ချစ်တဲ့သူ၊ ငြိမ်းချမ်းရေးကို လိုလားသူ၊ ငြိမ်းချမ်းရေးအတွက် ကိုယ့်အတ္တတွေ အောင်နိုင်သူ၊ နေဝင်ချိန်ရောက်လို့ အာဏာလွဲချိန်မှာ သူ့ရဲ့ပြည့်ဝလှတဲ့ နှလုံးသားနဲ့ ပညာကို ကောင်းကောင်း အသုံးချပြီး ပြည်သူတွေကို အကောင်းဆုံးပေးခဲ့တဲ့ ပြည်သူ့ တွေရဲ့ ဘုရင်မကြီးတစ်ယောက် အဖြစ်မြင်မိကြောင်း ပြောချင်ပါတယ်။
.